Илјада и 60 функционери за април добиле повисоки плати за 78 проценти, информираше денеска министерот за финансии Фатмир Бесими. Платите на функционерите се зголемија по одлуката на Уставен суд. За повисоки плати на функционерите до крајот на годината ќе се потрошат дополнителни 960 милиони денари од Буџетот на државата.
Министерот денеска потврди дека добил плата повисока за 78 проценти. Досегашната плата му била 71.145 денари, а за април му се исплатени 125.960 денари.
Видете и ова: Функционерите ќе добијат по 1000 евра покачување на плата
Бесими смета дека сега не е најповолно време за усогласување и зголемување на платите во јавниот сектор, бидејќи ќе има импликации на инфлацијата и препорачува зголемувањето на плати да се имплементира од 2024 година. Според него, платите во јавниот сектор треба да растат ако расте продуктивноста и ако се зголемат платите во реалниот сектор.
„Усогласувањето на платите на Економско-социјалниот совет ќе трае подолго, а методологијата за зголемување на плати може да се донесе побрзо, рече Бесими на средбата со новинарите.
Инфографика - Колкава плата ќе земат државните функционери за април 2023
Неодамна Уставниот суд укина одредба од Законот за плати за коефициентите на плати со која се овозможи на јавно избраните функционери да им се зголемат платите за 78 отсто. Одредбата за коефициентите на плати донесена во 2012 година пред Уставниот суд беше оспорена од адвокат. Со неа покрај функционерите во Владата се опфатени и пратениците, градоначалниците, судиите,..., и другите избрани и именувани функционери.
Во меѓувреме вработените во јавниот сектор бараат да им се усогласат платите со порастот на минималната, која од минатиот месец изнесува околу 20 илјади денари.