Во Брисел на 15 мај продолжува дијалогот меѓу Србија и Косово со состанок на шефовите на преговарачките тимови на Србија и на Косово, Петар Петковиќ и Бесник Бислими. Средбите се во рамки на дијалогот меѓу Белград и Приштина под покровителство на Европската унија.
Во фокусот на разговорите ќе биде имплементацијата на Договорот за нормализација на односите и анексот на тој договор.
Главниот преговарач на Косово Бесник Бислими и шефот на српската делегација Петар Петковиќ најпрво ќе имаат одвоени средби со специјалниот пратеник на Европската унија за дијалог Мирослав Лајчак, а потоа ќе следи заедничка средба.
Средбите започнуваат во утринските часови, а нивното времетраење ќе зависи од текот на разговорите.
Видете и ова: Лајчак во Белград на средба со ВучиќСпецијалниот претставник на ЕУ за дијалог меѓу Белград и Приштина, Мирослав Лајчак, кој минатата недела ги посети Приштина и Белград, изјави дека претстојниот состанок во Брисел е добра можност да се постигне договор за конкретни следни чекори.
Лајчак, кој прво престојуваше во Приштина, рече дека имал „важна дискусија во врска со нацрт-статутот на Заедницата на српските општини“ со премиерот на Косово, Албин Курти. Потоа во Белград разговараше со претседателот на Србија, Александар Вучиќ и директорот на Канцеларијата на Владата на Србија за Косово и Метохија, Петар Петковиќ, за натамошниот начин за спроведување на договорот.
Последниот состанок во Брисел се одржа на 2 мај, на кој учествуваа Вучиќ и Курти, а беше усвоена и Декларацијата за исчезнати лица, но не беше постигнат напредок по прашањето за Заедницата на општините со српско мнозинство на Косово.