Кина го почитува „суверениот статус“ на земјите настанати од поранешниот Советски Сојуз, соопшти на 24 април кинеското Министерство за надворешни работи. Изјавата доаѓа по контроверзните изјави на кинескиот амбасадор во Франција.
„Кина го почитува суверениот статус на републиките настанати по распадот на Советскиот Сојуз во 1991 година“, изјави за новинарите портпаролката на кинеското Министерство за надворешни работи, Мао Нинг.
Кинескиот амбасадор во Франција, Лу Шаје, на прашањето за украинската провинција Крим, која Москва ја анектираше во 2014 година, го негираше суверенитетот на поранешните советски републики.
Државите од поранешниот Советски Сојуз немаат ефективен статус во меѓународното право, бидејќи не постои меѓународен договор за одредување на нивниот статус на суверени земји, рече амбасадорот во петокот.
Неговите изјави предизвикаа револтирани реакции, а шефот на европската дипломатија Жозеп Борел ги нарече „неприфатливи“.
Видете и ова: Индија ќе ја надмине Кина по број на населениеЕУ може само да претпостави дека тие изјави не го претставуваат официјалниот став на Кина, рече Борел.
„Кина го почитува суверенитетот, независноста и територијалниот интегритет на сите земји и ги поддржува целите и принципите на Повелбата на ОН, изјави денеска портпаролката на кинеското МНР.
Таа рече дека по распадот на Советскиот Сојуз, Кина била една од првите земји што воспоставила дипломатски односи со нив.
Трите балтички држави Литванија, Летонија и Естонија денеска ќе ги повикаат на разговор кинеските амбасадори во тие земји по изјавите на кинескиот амбасадор во Франција, во кои тој го доведе во прашање суверениот статус на териториите на поранешниот Советски Сојуз.