Судирите во Судан меѓу армијата и паравоените сили на генералот Мохамед Хамдан Дагл продолжуваат да беснеат на 17 април, трет ден по ред. Речиси сто луѓе загинаа во борбите, вклучително и тројца хуманитарни работници на ОН.
Двете страни во неделата објавија дека го прифаќаат барањето на ОН за тричасовна „хуманитарна пауза“ за да се овозможи евакуација на ранетите, но се уште не е познато како точно се придржувале до договорениот прекин на огнот, пишува Би-Би-Си.
Лекарите предупредија дека ситуацијата во болниците во Картум е исклучително тешка и дека поради конфликтот медицинските работници тешко доаѓаат до ранетите. Според синдикатот на лекарите, досега загинале речиси 100 лица, а повеќе од 1.000 се ранети.
Главниот одбор на судански лекари објави дека се убиени 97 цивили и десетици припадници на безбедносните сили. Светската здравствена организација (СЗО) наведува дека во конфликтот досега загинале повеќе од 83 лица, а околу 1.100 се ранети.
„Уплашени сме, не спиевме 24 часа поради вревата бидејќи куќата се тресеше. Загрижени сме дека ќе останеме без вода и храна, и лекови за татко ми дијабетичар“, рече Худа, жител на Картум во изјава за новинската агенција Ројтерс.
Видете и ова: Борби меѓу воените ривали за власт во Судан, убиени десетици борци и цивилиШефовите на американската и британската дипломатија, на состанокот на Групата седум индустриски развиени земји (Г7) во Јапонија, на 17 април повикаа на итен прекин на насилството во Судан.
„Сите наши партнери силно веруваат во потребата од итен прекин на огнот и продолжување на преговорите“, изјави американскиот државен секретар Ентони Блинкен по средбата со британскиот министер за надворешни работи Џејмс Клеверли.
Борбите што избувнаа во саботата меѓу воените единици лојални на генералот Абдел Фатах ал-Бурхан и Силите за брза поддршка (РСФ), предводени од генералот Мохамед Хамдан Дагал, беа први откако тие ги здружија силите за соборување на диктаторот Омар Хасан ал-Башир во 2019 година.
Откако беше соборен Омар ал Башир, Судан е управуван од Советот на генерали.
Силите за брза поддршка и суданската војска се натпреваруваат за власт, додека политичките фракции преговараат за формирање преодна влада по воениот удар во 2021 година.
Насилството избувна на 15 април по неколкудневни тензии околу патната карта за транзиција на земјата кон цивилно владеење. Една од главните пречки се плановите за интегрирање на РСФ со 100.000 војници во армијата и прашањето кој потоа ќе ги води новите сили.
Силите за брза поддршка, составени од членови на милицијата Џанџавид, беа обвинети за злосторства за време на долгата војна што започна во 2003 година во Дарфур, западен Судан, и се обвинети за вмешаност во задушувањето на бунтот против Омар ал-Башир.
Војската изјави дека нема да преговара со Силите за брза поддршка доколку тие не бидат распуштени.
Продолжувањето на конфронтацијата може да го втурне Судан во поширок конфликт, додека земјата се бори со економски колапс и племенско насилство.