Над 460 загинати во тропскиот циклон Фреди во Југоисточна Африка

Циклонот Фреди во Малави

Циклонот Фреди во Малави

Во тропскиот циклон Фреди, кој ја погоди Југоисточна Африка, загинаа 463 лица, објави денеска јужноафриканското радио Ес Еј Би Си.

Невремето предизвика најголема штета во Малави, каде загинаа 360 луѓе. Уништени се илјадници куќи и згради.

Според прелиминарните проценки, материјалните загуби достигнуваат десетици милијарди долари.

Видете и ова: Поплави и тропски циклон во Индонезија, над 120 мртви

Фреди се формирал во Индискиот Океан северозападно од Австралија и се распаднал по 38 дена вечерта на 14 март. Тоа беше најдолготрајниот циклон откако беа направени набљудувања во овој дел од земјината топка. Максималната брзина на ветерот во центарот на невремето достигна 62,6 метри во секунда.

Циклонот помина повеќе од 8.000 километри, а ги погоди Маурициус, Мадагаскар, Малави и Мозамбик.