Амбасадорот на ЕУ, Дејвид Гир смета дека европското знаменце треба да се употребува само кога се во прашање закони што се поврзани со европските норми и стандарди, но не и да се користи за да се избегне јавната дебата при носењето на важни закони.
„Нема да коментирам поединечен закон, но сакам да го потенцирам генералниот принцип, што е од особена важност, дека скратената процедура во Собранието треба да се користи само кога се работи за специфични закони коишто се поврзани со европското законодавство. Европското знаменце треба да се употреби само кога се во прашање закони што се поврзани со европските норми и стандарди“, порача евроамбасадарот Гир.
Тој додаде дека причината поради која е дозволена употребата на европското знаменце при носењето на законите е за забрзување на реформите што се потребни за приближување кон европското законодавство.
„Во никој случај тоа не треба да се користи за да се намали дискусијата за важни закони што се во прашање“, истакна амбасадорот Гир во одговор на барањето упатено до него од Асоцијацијата на спортски обложувалници (АСОМ) за коментар во врска со носењето на Законот за игри на среќа.
ДУИ се надева на „два во еден“ против спортските обложувалници
Од АСОМ, вчера, упатија повик до евроамбасадорот Гир за соодветна реакција, оценувајќи дека Владата прави злоупотреба на европското знаменце и без јавна дебата сака да го донесе новиот Закон за игри на среќа, со кој како што велат, голем број вработени во оваа дејност ќе останат без работа.
Владата ги утврди Предлог-измените на Законот за игрите на среќа и за забавните игри, предложен од Министерството за финансии, според кој автомат-клубовите и спортските обложувалници нема да смеат да бидат на оддалеченост помала од 500 метри од основните и средни училишта. Според владата, ова се прави за заштита на младата популација. Со измените исто така се зголемуваат надоместоците за лиценци за игри на среќа.