Руска ракета уништи станбена зграда во источниот украински град Краматорск во средата вечерта, при што загинаа најмалку две лица, а седум беа повредени, напиша на Телеграм регионалниот гувернер Павло Кириленко. „Спасувачите, полицијата и комуналните претпријатија се на местото на нападот за да поминат низ урнатините на уништената зграда. Веројатно се уште има луѓе под него“, рече тој. Најмалку 44 лица загинаа во минатиот месец кога руски проектил погоди станбена зграда во источниот град Днипро. Кириленко објави фотографија од нешто што изгледа како четирикатна зграда која претрпе големо уништување.
Вашиот пребарувач не подржува HTML5
Видеа од фронтот покажуваат интензивни битки во источна Украина
Украинскиот сервис на Радио Слободна Европа објави кратко видео на кое се гледа како спасувачите работат под рефлектори додека снегот паѓа врз урнатините. Украина ги обвинува руските сили за неселективно гранатирање на цивилната инфраструктура, обвинение кое Москва го негира. Украина минатиот април соопшти дека 57 лица загинале кога руски проектил погодил железничка станица во Краматорск. Москва ја отфрли одговорноста, велејќи дека проектилот бил украински.