Шефицата на Европската комисија Урсула фон дер Лајен, во пресрет на Самитот ЕУ – Украина наредната недела, изјави дека Украина има безрезервна поддршка од Европската унија (ЕУ) и дека земјата треба да ги надвладее руските напади за да ги одбрани европските вредности.
„Ние сме на страната на Украина без никакво ако и но“, рече таа на настан организиран од нејзината партија – Христијанско демократската унија, во германскиот град Дизелдорф.
Украина „се бори за нашите заеднички вредности, се бори за почитување на меѓународното право и за принципите на демократијата, и затоа Украина мора да победи во оваа војна“, рече таа.
Самитот ЕУ – Украина е закажан за 3 февруари.
Скоро цела година Украина води војна против Русија, која ја почна инвазијата врз украинска територија на 24 февруари минатата година.