Најмалку три лица загинале во руски напад во Доњецк

Најмалку три луѓе загинале во руски напад на град во источниот регион Доњецк на 28 јануари.

Регионалниот гувернер Павло Кириленко на Телеграм објави дека загинале тројца луѓе, а најмалку две се ранети во нападот на станбен кварт во градот Констијантинивка.

Во нападот се оштетени четири станбени згради и хотел.
Претходно, на 28 јануари, Кириленко рече дека четири лица биле убиени, а најмалку седум биле ранети од руските напади во последните 24 часа.

Претседателот на Украина, Володимир Зеленски рече дека ситуацијата на фронтот е „исклучително тешка“, особено во Доњецк, каде што, како што рече, во тек се големи битки за Вуледар и Бахмут, град кој е практично срамнет со постојаните руски бомбардирања.

Зеленски, во своето ноќно видео обраќање на 27 јануари, рече дека интензитетот на борбите покажува дека на Украина итно и треба повеќе оружје за да се избори со растечкиот руски притисок.

Генералштабот на вооружените сили на Украина во својот дневен извештај на почетокот на 28 јануари соопшти дека руските трупи продолжиле да притискаат со повеќестрана офанзива во источните украински региони Доњецк и Луганск.

„Непријателот продолжува да спроведува офанзивни дејствија во правците Бахмут, Авдијивка и Новопављивка. Во насоките Купјанск, Лиман, Запорожје и Керсон, непријателот е во дефанзива“, се вели во соопштението.

Портпаролот на украинската војска Серхиј Череватиј изјави за локалните медиуми дека „има жестока борба“ во Вуледар.
Вуледар, кој пред инвазијата имаше околу 15 илјади жители, има стратешко значење како комуникациски јазол во јужен Доњецк.

Секретарот на Советот за безбедност на Украина, Олексеј Данилов, за РСЕ изјави дека Москва се подготвува за нова офанзива на 24 февруари, на првата годишнина од руската инвазија.

Видете и ова: Зеленски ја поздрави полската испорака на тенкови во Украина

„Сега се подготвуваат за максимално активирање... и веруваат дека до годишнината треба да имаат некои достигнувања“, рече Данилов.

Западните сојузници на Украина продолжуваат да ветуваат воена опрема и помош за зајакнување на одбраната на Киев.

Портпаролот на американската национална безбедност Џон Кирби рече дека Вашингтон очекува „интензивен период на борби“ во наредните месеци“, додавајќи дека „нема знаци“ за прекин на војната.

Зеленски на 27 јануари рече дека на Украина и се потребни до 500 тенкови.