Шефот на руската Државна дума изјави дека ветените испораки на дополнително оружје за Киев од западните земји би можеле да ја зголемат војната во Украина на ново ниво што може да резултира со „глобална катастрофа“.
Вјачеслав Володин, на својот канал Телеграм, на 22 јануари напиша дека „доколку Вашингтон и земјите на НАТО испорачаат оружје што ќе се користи за удари на цивилни градови и обид за заземање на нашите територии... тоа ќе доведе до одмазднички мерки со користење на помоќно оружје“.
Коментарите на шефот на долниот дом на рускиот парламент беа општо земени дека значат нуклеарно оружје и беа додадени на листата на руски претставници кои неодамна се заканија со значителна ескалација на неиспровоцираната војна што Кремљ ја започна против Украина, пред 11 месеци.
Коментарите доаѓаат и откако претставници на 54 земји се собраа минатата недела во Германија за да ја координираат дополнителната воена помош за Украина. Членовите на Украинската Контакт група на 20 јануари објавија нов пакет испораки на оружје, вклучувајќи системи за противвоздушна одбрана, ракети и механизиран оклоп, чија цел е да и помогне на Украина да успее во очекуваната контраофанзива за да ги потисне руските сили од украинска територија.
Во септември, Русија анектираше четири украински територии, односно источните региони Доњецк и Луганск, како и јужните региони Запорожје и Херсон, преку како што нашироко се сметаше - лажни референдуми.
Потегот за анексија на украинските територии седум месеци по руската инвазија на Украина беше осуден од Обединетите нации и беше признаен само од членките на ОН и руски сојузници Сирија и Северна Кореја.
Руските нуклеарни закани ги враќаат старите засолништа во Европа
Во 2014 година, Русија илегално го анектираше украинскиот полуостров Крим откако руските сили ја окупираа територијата, а ги поддржа сепаратистите во украинските региони Доњецк и Луганск кои се борат против Киев. Украина вети дека ќе ја врати целата нејзина територија окупирана од руските сили и најави дека не може да се преговара за отстапување територии на Русија во какви било идни мировни преговори.
Володин ја префрли одговорноста на Вашингтон и на Брисел за спречување ескалација на војната во Украина, во која руските сили беа меѓународно осудени за наводни воени злосторства и удари врз цивилни цели и енергетска инфраструктура, во обид да ја намалат одлучноста на Украинците во текот на зимата.
„Членовите на [американскиот] Конгрес, пратениците на Бундестагот, Националното собрание на Франција и другите европски парламенти мора да ја сфатат својата одговорност кон човештвото“, напиша Володин.
„Со своите одлуки Вашингтон и Брисел го водат светот кон страшна војна: кон сосема поинаква воена акција од денес“, дополни тој.
Володин, исто така, ги опиша наводните аргументи од нуклеарните сили дека тие не користеле оружје за масовно уништување во локалните конфликти поради „неодржливост“, велејќи дека „овие држави не се соочиле со ситуација каде што постои закана за безбедноста на нивните граѓани и територијалниот интегритет на земјата."
Кремљ ја прикажа својата неиспровоцирана инвазија на Украина, за која вели дека еволуирала во „прокси“ војна со САД и европските држави, како неопходна за да се елиминира егзистенцијалната закана за Русија. Сугестијата дека НАТО или други западни земји претставуваат таква закана беше целосно отфрлена од западните сили.
На 19 јануари поранешниот претседател Дмитриј Медведев го предупреди НАТО дека поразот на Русија во Украина може да предизвика нуклеарна војна.
„Нуклеарната сила која губи во конвенционална војна може да предизвика избувнување на нуклеарна војна“, напиша на Телеграм Медведев, сојузникот на рускиот претседател Владимир Путин.
Истиот ден рускиот амбасадор во Соединетите држави Анатолиј Антонов изјави дека Русија ќе возврати ако западното оружје се употреби за цели на Крим окупиран од Русија, велејќи дека „едноставно е невозможно да се победи Русија“.
Портпаролот на Кремљ, Дмитриј Песков, пак, пред состанокот на украинските земји донатори во Германија, рече дека изгледите за дополнителни испораки на оружје „ќе значат доведување на конфликтот на сосема ново ниво, што, се разбира, нема да биде добро од гледна точка на глобалната и паневропската безбедност“.