Од Даравелски до Рама

АЛБАНИЈА - „На здравје. Нека биде добра година за Албанците каде и да се“, напиша албанскиот премиер Еди Рама вечерва на својот профил на Фејсбук, објавувајќи фотографија од средбата со лидерите на албанските партии во Македонија. На фотографијата од средбата во Тирана, Рама им наздравува на своите гости.

УКРАИНА - Околу 100 украински војници наредната недела ќе заминат во американската воена база Форт Сил во Оклахома, каде што ќе ја започнат обуката за ракетниот одбранбен систем Патриот. Украина со месеци бара од Соединетите Американски Држави (САД) да ѝ го обезбедат противвоздушниот систем за заштита од постојаните руски напади, затоа што со него може да се гаѓаат авиони, крстаречки ракети и балистички ракети со краток дострел.

ЕУ - Летото 2022 година било најтопло во Европа досега. Измината година, пак, е втората најжешка година досега, пишува Ројтер повикувајќи се на научниците од Европската унија. Европа го доживеа вториот најтопол јуни досега со околу 1,6 степени Целзиусови над просекот и најтоплиот октомври, со температури речиси два Целзиусови степени над просекот.

БИХ - Рускиот претседател Владимир Путин е последниот во низата кој се закити со орденот на ентитетот Република Српска (РС). Досега, ваков орден во вид на ѓердан, добиле сите претседатели на Србија, патријарсите на СПЦ и пет лица кои се осудени од Хашкиот трибунал за геноцид и други воени злосторства извршени во војната во Босна и Херцеговина и Хрватска.

ГЕРМАНИЈА - Германската министерка за надворешни работи Аналена Бербок на 10 јануари дојде во ненадејна посета на источниот украински град Харкив. Таа вети дека ќе испрати повеќе оружје за Украина. Нејзиното ветување доаѓа на помалку од една недела откако Берлин вети дека ќе испрати борбени возила кои Украина ги бараше.

КОСОВО - Косовскиот премиер Албин Курти изјави дека тесно ќе соработува со САД за нормализирање на односите со Србија. Тој додаде дека „мора да разбереме дека имаме сè поабнормална Србија“.

МАКЕДОНИЈА - Поранешниот градоначалник на Битола, Владимир Талески започна со издржување на затворска казна за случајот „Транспортер“. Тој синоќа бил спроведен во затворот во Прилеп. Талески помина три години во домашен притвор, а во меѓувреме земаше плата од Битолскиот народен театар каде е вработен како актер.

МАКЕДОНИЈА - Во Собранието денеска беше верификуван мандатот на новата пратеничка Даниела Стојановска – Пановска од СДСМ. Таа е од Изборнта единица 3 и досега била професорка во средно училиште.
Стојановска - Пановска доаѓа на местото на пратеникот Зеќир Рамчиловиќ, кој е именуван за амбасадор во Црна Гора.

МАКЕДОНИЈА - Второто полугодие од школската година наместо на 18 јануари ќе започне на 23 јануари, одлучи Владата на денешната седница.
На седницата се одлучувало по предлог на Министерството за образование и наука да се продолжи зимскиот распуст. Ваквата одлука е донесена за да се заштеди на греење и за да заштити здравјето на децата.

МАКЕДОНИЈА - На граничниот премин Табановце попладнево е приведен Драган Даравелски, поранешниот директор на Царина кој беше на чело на управата од 1999 до 2002 година, а се бараше по меѓународна потерница.

ЕУ - Официјални лица од Европската унија и НАТО се согласија да ја „зајакнат“ нивната соработка за безбедност и поддршка на Украина додека се бори да ја одбие руската инвазија. Заедничката декларација за соработка НАТО-ЕУ, потпишана денеска во Брисел, има за цел да ја подобри соработката и да ја заштити критичната инфраструктура, како и да одговори на безбедносните импликации предизвикани од климатските промени, странското мешање и кампањите за дезинформација, изјави шефот на НАТО Јенс Столтенберг.