Американскиот претседател Џо Бајден го пречека украинскиот претседател Володимир Зеленски во Белата куќа на 21 декември. Бајден вети дека ќе ја зајакне поддршката за Украина и му порача дека САД поддржуваат „праведен мир“ за Украина
„Чест е да се биде на ваша страна“, му рече Бајден на Зеленски, пред двајцата лидери да ја започнат средбата во Овалната соба. Украинците го „инспирираат светот“ во нивната борба за слобода и демократија, додаде Бајден.
Американскиот претседател, исто така, вети дека ќе продолжи да испраќа финансиска, воена и хуманитарна помош за Украина, аи Зеленски изрази благодарност „од срце“ за американската поддршка.
Ова е првото патување на Зеленски во странство од почетокот на руската инвазија врз неговата земја. Посета доаѓа во време кога Конгресот се подготвува да гласа за сеопфатниот нацрт-закон за трошоци што вклучува одредба за доделување на повеќе од 40 милијарди долари дополнителна воена помош за Украина.
Претседателот на САД Џо Бајден се сретна со украинскиот претседател Володимир Зеленски во Овалната соба на Белата куќа, среда, 21 декември 2022
Зеленски пристигна во Белата куќа во џемпер и панталони во воен сил со маслинесто зелена боја. Тој беше пречекан од Бајден и првата дама Џил Бајден.
По пристигнувањето на Зеленски, САД ја најавија својата најголема поединечна испорака на оружје за Украина, вклучително и ракетите земја-воздух Патриот. Во соопштението на Стејт департментот се вели дека ракетните системи се „способни да соборуваат крстосувачки ракети, балистички ракети со краток дострел и авиони на значително повисок плафон од претходно обезбедените системи за противвоздушна одбрана“.