Катар денеска ја осуди истрагата за корупција на Белгија и суспензијата на негов пристап до Европскиот парламент, велејќи дека тоа може негативно да влијае на односите на двете земји и снабдувањето со природен гас.
Ева Каили, грчка европратеничка, е една од шесте лица уапсени по рациите во кои беа откриени најмалку 1,5 милиони евра во готовина.
Тие се обвинети дека наводно добивале пари и подароци од Катар во замена за влијание врз одлуките, а парламентот на ЕУ минатата недела го суспендираше пристапот на Катар до институцијата.
Видете и ова: Одлука за притворот на осомничените за скандалот со мито во ЕУ„Одлуката да се воведе такво дискриминаторско ограничување што го ограничува дијалогот и соработката со Катар пред крајот на правниот процес, негативно ќе влијае на регионалната и глобалната безбедносна соработка, како и на тековните дискусии околу глобалната енергетска сиромаштија и безбедност“, рече катарскиот дипломат.
„Силно ги отфрламе наводите дека нашата влада е поврзана со недолично однесување“, се додава во соопштението во кое се наведува дека е „длабоко разочарувачки“ што белгиската влада не вложила напори да соработува со владата на Катар за да ги утврди фактите.
Во соопштението, исто така, се наведува дека Катар и Белгија соработувале „за време на пандемијата COVID-19“ и дека Катар е „важен снабдувач на ЛНГ за Белгија“.
Белгиските обвинители соопштија дека ја истражувале корупцијата во парламентот на ЕУ повеќе од една година пред рациите и апсењата во изминатите 10 дена.
Ева Каили треба да се појави пред белгискиот суд на 22 декември.
Таа негира дека добила пари од Катар, изјави еден од нејзините адвокати во Грција.