Украинската војска тврди дека се водат интензивни борби поради руските напади врз градови во регионот Донбас во источна Украина. Украинскиот претседател Володимир Зеленски во ноќното видео обраќање на 9 декември рече дека московските трупи донеле „пекол под руското знаме“ во неговата земја.
Тој ја нарече ситуацијата со најтешките борби во источна Украина „многу тешка“, особено во Бахмут и Соледар.
Зеленски за Бахмут посочи дека градот кој имал околу 70.000 жители пред инвазијата сега е уништен.
„Уште еден град во Донбас кој руската армија го претвори во изгорени урнатини. Нема станбена зона што не е оштетена од гранатирањето што трае подолго време“, вели Зеленски.
Во меѓувреме, Соединетите Американски Држави и Обединетото Кралство предупредија дека Русија се повеќе се потпира на Техеран за да ги одржи своите воени напори бидејќи остануваат стравувањата од поширок конфликт во 10-тиот месец од нејзината инвазија на Украина.
Британската амбасадорка во ОН Барбара Вудворд изјави доцна на 9 декември дека покрај стотиците ирански беспилотни летала веќе префрлени во Русија од август за да „убиваат цивили и илегално да гаѓаат цивилна инфраструктура“ во Украина, „Русија сега се обидува да набави повеќе оружје, вклучително и стотици на балистички ракети“.