Средните училишта во кои имаше дојави за бомби, треба да најдат начин како да се надоместат пропуштените часови и тоа да се направи до крај на првото полугодие, велат од Министерството за образование и наука (МОН).
Заканите за поставени бомби во средни училишта во Скопје стартуваа на 26 октомври, по што наставата во школите се прекинуваше и учениците се евакуираа. Во сите случаи досега се покажа дека станува збор за лажни дојави за бомби.
Според МОН, местото на учениците е во училишните клупи и секој прекин на наставата го попречува нивниот правилен развој. Затоа, додаваат од Министерството, во координација со МВР, локалните самоуправи, раководствата на училиштата и низа партнерски домашни и меѓународни организации континуирано се работи на нивна заштита преку подигнување на безбедноста во училишните објекти.
Од Министерството се надеваат дека наскоро ќе бидат пронајдени виновниците за дојавите за бомби и дека соодветно ќе бидат казнети.