Министерството за внатрешни работи информира дека се лажни пријавите за поставена експлозивна направа во девет училишта во Скопје.
„Направени се сите потребни проверки во врска со денешните пријави дека девет училишта во Скопје добиле мејл со закана за поставена експлозивна направа и утврдено е дека станува збор за лажни пријави“, соопшти вечерва МВР.
Претходно денеска девет училишта во Скопје добија дојави за поставени бомби. Околу 14 часот денеска во СВР – Скопје е пријавено дека на мејл адреси на девет училишта во Скопје е упатена закана за поставена бомба.
Веднаш по добиената пријава, нагласуваат од МВР, од полициски службеници биле преземени мерки за безбедно евакуирање на училиштата, а потоа биле извршени и детални проверки од тимови за антитерористички проверки кои утврдиле дека се работи за лажни пријави.
Дојави за поставени бомби беа упатени и вчера преку мејл до осум средни скопски училишта, а по акцијата на полицијата, беше утврдено дека се лажни.
- Закани за поставени бомби во 5 училишта во Скопје
- МВР- Лажна дојава за бомба во скопски училишта
- Закани за бомби во девет училишта во Скопје
Министерот за внатрешни работи Оливер Спасовски денеска изјави дека истрагата за вчерашните дојави за поставени бомби во осумте скопски средни училишта е тек.
„Ги знаеме првите податоци за тоа од каде се испратени тие мејлови и најважно е да успееме да ги откриеме сите ИП адреси од каде доаѓа овој монструозен чин, без разлика дали станува збор за хибриден напад врз Северна Македонија или политички игри, како една од претпоставките“, изјави Спасовски за Македонската телевизија.
Тој додаде дека без разлика на што се однесува, никој не смее да дозволи да си игра со судбините на децата и на граѓаните.