Од Илинденска до Мерцедес
РУСИЈА - Германската фирма Мерцедес- Бенз денеска соопшти дека ќе се повлече во целост од рускиот пазар и дека ќе го продаде уделите во подружниците на локални инвеститори. Оваа германска фирма престана со производството и извозот во Русија уште при почетокот на март, по руската инвазија врз Украина.
БУГАРИЈА - Бугрскиот претседател Румен Радев денеска ги започна политичките консултации за формирање нова бугарска влада. Првиот состанок Радев го оствари со партијата ГЕРБ.
РУСИЈА - На 30 месеци затвор е осуден соработникот на затворениот руски опозиционер Алексеј Навални, фотографот Руслан Ахметшин. Судот во рускиот град Архангелск ја донесе пресудата денеска по обвинението за рехабилитација на нацизмот.
МАКЕДОНИЈА - Лажна е дојава за поставени бомби во скопските училишта, вели портпаролот на Министерството за внатрешни работи Тони Ангеловски за Телма. Тој изјави дека полицијата излегла на терен и досега ги проверила поголемиот дел од училиштата за каде што им пристигнала дојава дека била поставена бомба.
СРБИЈА / МАКЕДОНИЈА / АЛБАНИЈА - „Отворен Балкан“ e препознаен како позитивна регионална иницијатива која веќе дава конкретни резултати за компаниите и за граѓаните кога се во прашање европските слободи за движење на луѓе, услуги и стоки, констатираа на денешниот онлајн состанок премиерот Димитар Ковачевски, српскиот претседател Александар Вучиќ и албанскиот премиер Еди Рама, во пресрет на одржувањето на Самитот за Берлинскиот процес, што ќе се одржи на почетокот на ноември во Берлин.
КИНА - Во Шангај денеска почна да се користи првата вдишлива вакцина против коронавирусот, а таа ќе биде бесплатна засилена доза за луѓето кои веќе се вакцинирани, се вели во соопштението на кинеските здравствени власти. Вакцинацијата против коронавирусот не е задолжителна во Кина, но властите сакаат што е можно повеќе луѓе да добиваат дополнителни дози пред да се олеснат строгите ограничувања, бидејќи мерките за борба против пандемијата ја забавуваат економијата во време кога остатокот од светот го укина најголемиот дел од мерки.
ИРАН - Иранците се собраа на гробот на Махса Амини за да одбележат 40 дена од нејзината смрт и покрај предупредувањата на властите, додека националните протести продолжуваат. 22-годишната Амини почина во полициски притвор во Техеран на 16 септември, откако беше уапсена три дена претходно за „неправилно“ носење задолжителна исламска шамија или хиџаб. Нејзината смрт, за која властите велат дека била предизвикана од срцев удар, поттикна бран антивладини протести ширум земјата. Групата за заштита на човековите права во Иран со седиште во Осло, наведува дека во протестите досега загинале најмалку 215 луѓе, вклучувајќи 27 децата.
САД - Соединетите држави, Јапонија и Јужна Кореја во средата предупредија дека „неспоредливо“ ниво на одговор ќе биде оправдано доколку Северна Кореја изврши седма проба на нуклеарна бомба. Вашингтон и неговите сојузници веруваат дека Северна Кореја би можела да продолжи со тестирање нуклеарни бомби за прв пат од 2017 година.
УКРАИНА - Русија продолжува да напаѓа цели низ Украина, предизвикувајќи штета и убивајќи цивили, додека нејзините сили се подготвуваат за битка во стратешкиот јужен регион Керсон, соопштија украинските власти и војската. Генералштабот на украинските вооружени сили денеска соопшти дека повеќе од 40 населени места биле погодени од руски напади во текот на претходниот ден.
ВЕЛИКА БРИТАНИЈА - Новоименуваниот британски премиер Риши Сунак вети дека ќе ја поддржи Украина во „заклучокот“ од нејзината битка за одбивање инвазивни руски трупи, бидејќи Кремљ рече дека не гледа „никаква основа“ за позитивна промена во односите со Обединетото Кралство.
САД - Американскиот претседател Џо Бајден ја предупреди Русија дека употребата на тактичко нуклеарно оружје би била „неверојатно сериозна грешка“ откако Москва наведе дека Украина се подготвува да употреби таканаречена валкана бомба на своја територија. Москва го подигна тврдењето во текот на викендот. Украина и нејзините сојузници се сомневаат дека Русија можеби би употребила таканаречена валкана бомба, но за нападот ќе ја обвини Украина и ќе ја искористи за да ја оправда употребата на конвенционално нуклеарно оружје.
МАКЕДОНИЈА / ЕУ - Европски грант од 80 милиони евра за Северна Македонија и 500 милиони евра за регионот најави претседателката на ЕК Урсула Фон дер Лајен во Скопје на првата станица од нејзината балканска турнеја. Договорот меѓу ЕУ и Северна Македонија потпишан на македонски јазик.