Украинскиот претседател Володимир Зеленски ги отфрли обвинувањата на Москва дека Киев подготвува провокации користејќи „валкана бомба“, како што рече рускиот министер за одбрана Сергеј Шојгу за време на телефонските разговори со колегите од неколку земји.
„Ако Русија повика некого и каже дека Украина подготвува нешто, тоа значи само едно - Русија веќе го подготвила сето тоа. Верувам дека сега светот мора да реагира што е можно поостро“, рече Зеленски.
Шојгу вчера имаше телефонски разговори со министрите за одбрана на Турција, Франција, Велика Британија и САД.
Рускиот министер им ја пренел на своите колеги својата загриженост „за можната провокација на Украина“ и „можната украинска употреба на „валкана бомба“ на нејзина територија со цел да ја обвини Русија за тој напад.
- Шојгу разговараше со неговите колеги од САД и други НАТО земји во услови на стравувања од ескалација
Валкана бомба е мешавина од експлозиви, како што е динамит, со радиоактивен прав или пелети. Кога динамитот или другиот експлозив се активираат, експлозијата носи радиоактивен материјал во околината.
Разговорите на рускиот министер со колегите од другите земји доаѓаат во време кога Русија се соочува со голема украинска контраофанзива.
Руските власти го осудија „зголемувањето на украинскиот оган“ во неколку руски погранични области.