Членките на Европската унија се договорија за нови казнени мерки против Иран поради неговата испорака на самоубиствени беспилотни летала за Русија, соопшти денеска чешкото претседателство со ЕУ. „Земјите на ЕУ одлучија да ги замрзнат имотите на тројца поединци и еден ентитет одговорен за испорака на беспилотни летала и исто така се подготвени да ги прошират санкциите на уште четири ирански ентитети кои веќе беа вклучени во претходната листа на санкции“, се наведува во соопштението. Санкциите се очекува да стапат во сила денеска по нивното објавување во Службениот весник на ЕУ, правен регистар за регулативите на ЕУ.
Беспилотни летала камикази ги тероризираат украинските градови
Руските сили започнаа последователни бранови напади од 10 октомври врз украински цивилни и инфраструктурни цели користејќи беспилотни летала Шахед-136 од иранско производство. Претседателот Володимир Зеленски во своето редовно обраќање синоќа рече дека 233 ирански беспилотни летала Шахед биле уништени од украинската противвоздушна одбрана во последните 10 дена. Украинскиот министер за енергија Херман Халушченко на 20 октомври изјави дека Русија извршила околу 300 напади врз енергетскиот систем на Украина во изминатите 10 дена. И Москва и Техеран негираат договор за оружје поврзан со беспилотните летала. Западните сојузници на Украина рекоа дека ќе му обезбедат на Киев напредни системи за воздушна одбрана за да се спротивстави на руските напади.