НАТО ќе ѝ испорача системи за противвоздушна одбрана на Украина во наредните денови, изјави на 18 октомври генералниот секретар на НАТО, Јенс Столтенберг.
Најавата од Столтенберг доаѓа откако Украина соопшти дека во руските напади во измината недела дена се уништени речиси една третина од електраните во Украина.
Столтенберг, говорејќи на безбедносна конференција во Берлин, рече дека системите за противвоздушна одбрана ќе ѝ помогнат на Украина да се одбрани од напади, вклучително и од напади со беспилотни летала произведени во Иран. Иранските беспилотни летала доведоа до смртни случаи и предизвикаа голема штета откако Русија започна нов бран напади низ целата земја на 10 октомври.
Столтенберг рече дека одговорот на нападите е сојузниците да ги засилат своите испораки на системи за противвоздушна одбрана.
„Најважното нешто што можеме да направиме е да го исполниме она што го ветија сојузниците, да испорачаме уште повеќе системи за противвоздушна одбрана“, рече Столтенберг.
Тој вели дека НАТО „во наредните денови“ ќе испорача системи за да се спротивстави на специфичната закана од беспилотни летала, вклучително и оние од Иран.
Украинскиот претседател Володимир Зеленски претходно изјави дека денешните напади на Киев и на други украински градови, биле насочени кон станбени области и енергетска инфраструктура.
Зеленски на Твитер напиша дека нападите во последните недели предизвикаа масовни прекини на струја низ Украина и дека „не останува простор за преговори“ со рускиот претседател Владимир Путин.