Светската здравствена организација (СЗО) предупреди на претстојната „брутална зима“ во Украина која може да предизвика хуманитарна криза, поради руските напади кои предизвикаа сериозни оштетувања на инфраструктурата на земјата.
Ханс Клуге, директор на СЗО за Европа, денеска рече дека Киев ја има континуираната поддршка од оваа здравствена агенција, нагласувајќи дека СЗО е во Украина „на долги патеки“.
„СЗО е во Украина на долги патеки. Земјата и нејзиниот народ можат да сметаат на нашето партнерство и поддршка, денес и секогаш“, рече тој.
Клуге предупреди дека зимата ќе го отежне преживувањето на Украинците кои живеат во воената зона и повика на итна акција за поправка на здравствените установи уништени од руските напади.
Како што рече, приоритет е итно да се реагира на штетите предизвикани од нападите врз здравствените установи, од кои има 620 од почетокот на руската инвазија на 24 февруари.
„Мораме да ја зголемиме нашата поддршка за процесот на реконструкција. Премногу луѓе во Украина живеат несигурно, се движат од место до место, живеат во неквалитетни згради или без пристап до греење“, предупреди тој.
Тој посочи дека уништувањето на куќите и немањето пристап до гориво или струја поради оштетената инфраструктура може да стане прашање на живот и смрт доколку луѓето не можат да ги загреат домовите.
Претставник на СЗО рече дека повеќе од 800 000 куќи се оштетени или уништени во Украина од почетокот на војната, принудувајќи илјадници луѓе да живеат или во колективни центри или во оштетени згради.
Тој потсети дека последните економски анализи на Светска банка покажуваат дека војната може да турне 60 отсто од населението под прагот на сиромаштија.