Соединетите држави ја потврдија својата посветеност да ја бранат „секоја педа“ од територијата на НАТО пред денешните разговори меѓу министрите за одбрана од Алијансата кои ќе вклучуваат дискусии зад затворени врати на нивната група за нуклеарно планирање. Американскиот секретар за одбрана Лојд Остин ја потврди посветеноста на САД на колективната одбрана на НАТО по повторените нуклеарни закани од страна на рускиот претседател Владимир Путин во услови на неуспеси на бојното поле во неговата речиси осуммесечна инвазија врз Украина. „Ние сме посветени на одбраната на секоја педа од територијата на НАТО“, рече Остин.
Дали Русија ќе употреби нуклеарно оружје?
Тој зборуваше непосредно пред да присуствува на состанокот на Групата за нуклеарно планирање на НАТО, која е високо тело на Алијансата за нуклеарни прашања и се справува со политичките прашања поврзани со нејзините нуклеарни сили. На веб-страницата на НАТО се вели дека нејзината нуклеарна политика е под „постојана ревизија и е изменета и приспособена во светло на новите случувања“. Претседателот Владимир Путин ја засили својата реторика и воена активност во Украина откако неговата војска претрпе пораз на неколку фронтови во текот на изминатиот месец. Висок функционер на НАТО вчера изјави дека руски нуклеарен напад врз Украина „речиси сигурно ќе предизвика одговор од многу сојузници, а потенцијално и од самиот НАТО“, без да наведе детали.