Со низа церемонии во Њујорк денеска се одбележува 21 година од терористичките напади на Соединетите Држави во кои загинаа околу 3.000 луѓе, а повеќе од 25.000 беа повредени.
Терористичкиот напад врз кулите на Светскиот трговски центар во Њујорк и врз зградата на Пентагон го извршија членови на Ал Каеда со киднапирани патнички авиони.
Деветнаесет членови на Ал Каеда упаднаа во кабините на четири патнички авиони и ја презедоа контролата. Авион на „Американ ерлајнс“ влетал во северната кула СТЦ во долниот дел на Менхетен, а дваесет минути подоцна авион на „Јунајтед ерлајнс“ удрил во јужната кула.
Двете кули со по 110 ката се урнаа за помалку од два часа, што предизвика значителна штета и на околните згради. Трет авион киднапиран над Охајо се урна во западната страна на Пентагон, предизвикувајќи уривање на зградата. Четвртиот авион се упатил кон Вашингтон, но се урнал во поле во Пенсилванија откако патниците влегле во кабината и се бореле со киднаперите за контрола.
Лидерот на Ал Каеда Осама бин Ладен ја презеде одговорноста за нападите, наведувајќи ја поддршката за Израел и присуството на американската војска во Ирак и Саудиска Арабија како мотив. Седум години подоцна, Бин Ладен беше убиен.
Терористичкиот напад од 11 септември 2001 година е меѓу најзначајните настани што се случија од почетокот на 21 век, во однос на општите економски, социјални, културни и воени последици што следеа во САД и остатокот од светот. На местото на кулите „близначки“ во Њујорк е подигнат споменик на жртвите, а изграден е и нов Светски трговски центар.