Украинскиот премиер Денис Шмихал пристигна во Берлин на разговори со германскиот канцелар Олаф Шолц и други високи функционери. Тој е првиот највисок украински функционер кој е во посета на Германија по неколку месеци.
Посетата сигнализира крај на тензиите меѓу двете земји, бидејќи Киев во минатото ја критикуваше Германија дека дава премалку помош во борбата на Украина против инвазијата на соседна Русија од февруари.
Шолц го посети Киев во јуни, а оттогаш испораките на оружје се зголемија.
„Германија постигна огромен напредок во поддршката на Украина со оружје“, изјави Шмихал за германските медиуми пред неговото патување. Тој додаде дека на Киев му треба повеќе, особено „модерни борбени тенкови“ како германскиот Леопард 2.
Шмихал, исто така, рече дека неговата земја е подготвена да ја снабдува Германија со електрична енергија за да и помогне на најголемата европска економија да ја намали зависноста од рускиот увоз на енергија.