Руското Министерство за надворешни работи соопшти дека Москва привремено се повлекува од режимот на инспекција предвиден во договорот со САД за намалување на арсеналот на нуклеарно оружје. Министерството објави дека санкциите на западните земји ја оневозможуваат Русија да го спроведе договорот „во строга согласност со принципите на еднаквост на двете страни“, бидејќи руските инспектори не можат да влезат во САД и да ги извршуваат своите должности.
Меѓународен институт – Државите го зголемуваат арсеналот на нуклеарно оружје
Во соопштението се додава дека покрај забраната за влез на руски авиони во воздушниот простор на САД и нивните сојузници, пречка за руските инспектори се и построгите критериуми за издавање визи. Руското министерство нагласи дека повлекувањето од режимот на инспекција е привремено и дека Русија останува „целосно посветена на почитување на сите одредби од договорот“. Договорот за намалување на арсеналот на нуклеарно оружје беше потпишан во 2010 година од тогашните претседатели на САД и Русија, Барак Обама и Дмитриј Медведев. Во јануари минатата година тој беше продолжен за уште пет години.