Претседателот на ВМРО-ДПМНЕ Христијан Мицкоски упати честитка по повод државниот празник 2-ри Август - Илинден во која истакнува дека Илинден е најсветлиот ден во македонската историја.
Овој ден, истакнува Мицкоски, е симболот на македонската борба за слобода и државност, ден кој врзува две епопеи и еден идеал, а тоа е идеалот за слободна и независна Македонија. Генерации на синови и ќерки на Македонија се бореа сонот за слобода да стане јаве, наведува Мицкоски во честитката.
Претседателот на ВМРО-ДПМНЕ истакнува дека имаме историски аманет да ја градиме и чуваме нашата татковина од сите предизвици.
„Денес борбата, како никогаш до сега е жива, затоа што премрежијата и сенките од минатото се надвиснати над иднината. Идеалот за Македонија и општа сплотеност во таа борба, кој ги водел нашите предци и во најтешките и најмрачните времиња, мора да го продолжиме, за да не станеме повторно монета за поткусурување на хегемонистичките желби на Балканот. Идеалот за Македонија и борбата за подобра иднина се две работи за кои мораме паралелно да се бориме, бидејќи апатијата и сиромаштијата која сакаат да ни ја наметнат е првата стапка кон разнебитување. Овие битки мораме да ги добиеме, сплотени без разлика на нашата етничка, верска или политичка припадност. Овие битки ќе ги водиме заедно братски под бајракот на Македонија !“, вели меѓудругото Мицкоски во честитката.