Претставник на украинската одбрана изјави дека руските трупи се ангажирани во масовно прераспоредување на југот на земјата, вклучително и во областа каде што Украина започна контраофанзива. Секретарот на Советот за безбедност Олексеј Данилов изјави дека прераспоредувањето се одвива во правец на регионите Керсон, Мелитопол и Запорожје, а Русите внесуваат дополнителни сили. Наталија Хуменјук, портпаролка на Оперативната команда Југ, претходно на украинската телевизија изјави дека напредува украинската контраофанзива на југот на Украина. Официјален претставник на управата инсталирана од Русија во градот Керсон претходно изјави дека мостот Антонивски преку реката Днепар во украинскиот град под руска контрола е затворен. Официјални лица од двете страни претходно потврдија дека бил погоден од украински воздушен напад.
Борбите во Доњецк продолжуваат, руски воздушни напади врз украински региони кај Црното Море
Сепаратистите поддржани од Москва вчера тврдеа дека ја презеле контролата врз втората по големина електрана на јаглен во Украина во близина на градот Свитлодарск со помош на руските платеници од озлогласената воена групација Вагнер поврзана со Кремљ. Олексиј Арестович, советник на украинскиот претседател, пак изјави дека Русија постигнала „мала тактичка предност“ со заземањето на централата.