Новиот британски генерал смета дека неговата војска треба да биде подготвена за борба со Русија

Новиот висок генерал на армијата на Велика Британија вели дека руската инвазија на Украина го променила изгледот на британската војска, која мора да биде способна да се бори заедно со сојузниците и подготвена да ја порази Русија на бојното поле.

Генералот Патрик Сандерс со порака до војниците рече дека обемот на руската закана „покажува дека влеговме во нова ера на несигурност“.

• Разузнавачите предупредуваат на разнишан морал меѓу украинските и руските војници

Изјавата на генералот беше дел од обраќањето до сите чинови и државни службеници на 16 јуни, три дена откако тој ја презеде командата со британската армија. Извештаите во британските медиуми на 19 јуни опширно го цитираа ова обраќање.

Би-Би-Си цитираше извор од одбраната дека тонот на пораката не е изненадувачки. Изворот рече дека сите армии тренираат да се борат, но заканата очигледно се променила.

Сандерс рече дека негова должност е да ја направи британската армија „колку што може да биде посмртоносна и поефикасна“, додавајќи дека руската инвазија на Украина ја нагласува основната цел на војската да ја заштити Обединетото Кралство „и го засилува барањето да се одврати руската агресија заканувајќи се со сила“.

• НАТО предупредува дека борбите во Украина може да траат „со години“, додека Русија напаѓа на истокот

Сандерс, исто така, ја постави својата цел „да ја забрза мобилизацијата и модернизацијата на Армијата за да го зајакне НАТО и да и се ускрати на Русија шансата да окупира повеќе од Европа“.

Британскиот премиер Борис Џонсон, кој штотуку се врати од патувањето во Киев, на 19 јуни предупреди дека војната во Украина нема да заврши наскоро, а генералниот секретар на НАТО Јенс Столтенберг предупреди дека војната „може да трае со години“.

Сандерс е поранешен командант на стратешката команда на британската војска и командувал со операции во Босна, Ирак и Авганистан.