Кристијан Шмит, високиот претставник на Меѓународната заедница во Босна и Херцеговина, донесе одлука за доделување 12,5 милиони марки (околу шест милиони евра) на Централната изборна комисија за одржување на општите избори во октомври.
„Со оваа одлука наредувам Централната изборна комисија да добие сума од 12,5 милиони марки за организација на изборите. Тоа не исклучува дополнителни средства кои би можеле да бидат неопходни за одржување на изборите“, нагласи Шмит.
Тој додаде дека не е задоволен бидејќи морал да ја донесе таа одлука „затоа што тоа покажува дека политичарите одговорни за тоа не биле во можност да организираат нешто што само по себе е процедурална работа“.
Тој потсети дека заедно со претставниците на Организацијата за безбедност и соработка во Европа (ОБСЕ), Европската унија и САД на 20 јануари им пишал на одговорните и дека истиот апел го повториле и на 5 април, но не добиле одговор.
„Ја забележав вчерашната одлука донесена од Советот на министри на БиХ вчера со големо задоцнување, што е чекор во вистинската насока. Откако ја проверив, заклучив дека е добра, но не доволно добра. По заедничката средба со претставниците на Министерството за финансии и трезор на БиХ и на Централната изборна комисија на БиХ, дознав дека средствата не се доволни“, рече Шмит.
На 6 јули, Советот на министри на Босна и Херцеговина (БиХ) го усвои нацрт-државниот буџет, како и посебна одлука со која се обезбедуваат дел од парите за општите избори, закажани за втори октомври оваа година.
Со одлуката е одобрено позајмувањето од 9,7 милиони марки (околу 5 милиони евра) на Централната изборна комисија на БиХ од страна на Регулаторната агенција за комуникации (РАК) за спроведување на изборите.
Шмит додаде дека ова не е одлука која се однесува на самиот Изборен закон на Босна и Херцеговина и апелираше сите да разберат дека изборите не се донација од партиите за граѓаните, туку за нивните основни права.