Украина ќе може да извезува најмногу два милиони тони жито месечно, доколку Русија одбие да ја укине блокадата на црноморските пристаништа во земјата, изјави Тарас Висоцки, заменик министер за аграрна политика и храна на Украина.
Украина во моментов се обидува да извезе огромни залихи на жито по пат, река и железница за да спречи глобална прехранбена криза, но капацитетот на овој начин на извоз е помал.
Пред Русија да ја нападне Украина на 24 февруари, земјата можеше да извезува до 6 милиони тони жито месечно. Откако престанаа испораките на жито од украинските пристаништа, повеќе од 20 милиони тони жито се заглавени во силосите на таа земја.
„Мислам дека ја достигнавме границата. Најголемата количина што можеме да ја извеземе е околу 2 милиони тони месечно“, рече Висоцки.
- Русија, Турција, Украина и ОН со план за извоз на храна од украинските пристаништа
- Русија подготвена да овозможи извоз на жито од Украина
Тој рече дека дури и ако Русија ги деблокира пристаништата, на Украина ќе и требаат околу шест месеци да ги деминира водите околу пристаништата на Црното Море, што значи дека светот ќе остане без жито уште некое време.
Украина е четврти најголем извозник на житни култури во светот. Глобалните цени на пченицата достигнаа рекордно ниво во март, а зголемувањето на цените на храната предизвика протести во земјите во развој, како и забрзување на големите стапки на инфлација ширум светот.
Обединетите нации се обидуваат да посредуваат во договор за испорака на украинско жито од нивните пристаништа на Црното Море, како што е Одеса. Русија рече дека сака западните санкции да бидат укинати како дел од договорот.
Рускиот министер за одбрана Шојгу изјави дека украинските пристаништа Бердјанск и Мариупол, кои беа окупирани од руските сили, се деминирани и се подготвени да продолжат со испорака на жито.