ССМ со амандман побара зголемување на платите во јавниот сектор

Предлог-амандман за измени и дополнувања на Буџетот за 2022 година денека поднесе Сојузот на синдикати на Македонија (ССМ) со кој бара да се обезбедат финансии за платите повисоки за 2.806 денари во јавниот сектор.

Оттаму очекуваат тој да биде поддржан од сите пратеници, со што ќе се овозможи линеарно зголемување на платите за сите вработени во органите на државната и локалната власт, институциите кои вршат дејности од областа на образованието, науката, здравството, културата, трудот, социјалната заштита и заштитата на детето, спортот, армијата, полицијата , но и агенции, фондови, јавни установи и јавни претпријатија.

• ССМ- Генерален штрајк ако владата не ги исполни барањата до 21 јуни

Ако не ја добијат поддршката од пратениците, од ССМ ја повторија најавата за генерален штрајк на 22 јуни.

Ваквиот чекор уследи откако по презентацијата на ребалансот на Буџетот од ССМ видоа дека нема планирано средства за линеарно зголемување плати во јавниот сектор, како што им било ветено за време на преговорите. По ова, ССМ имаше една средба во Владата, но таа заврши без договор.

Вицепремиерот за економски прашања Фатмир Битиќи пак денеска најави нова средба во текот на оваа недела.

• ССМ бара да се повлечат законските измени за недела- неработен ден

„Имаме отворени прашања со ССМ. Не е само усогласувањето на платите и нивното барање за линеарно зголемување на платите. Тука е методологијата за раст на платите и законот за плати кој треба еднаш за секогаш да го реши прашањето за зголемувањето, ефикасноста, ефективноста. Се додека имаме отворени прашања, не би требало да повикаме на штрајк. Треба да седнеме на маса“, рече Битиќи најавувајќи дека на следната владина седница ќе бидат формирани работните групи од страна на Владата кои ќе треба да почнат да работат на одржливо решение.