Новата словенечка министерка за надворешни работи Тања Фајон ја повтори поддршката за влезот на Хрватска во Шенген, како и заложбата за влез на земјите од Западен Балкан во Европската унија, откако ќе ги исполнат условите.
Во изјавата по преземањето на функцијата од поранешниот министер Анже Логар, Фајон рече дека се залага за проширување на Европската унија, но дека не смеат да се заборават земјите од Западен Балкан откако Украина, Грузија и Молдавија аплицираа за членство.
„Ќе направам се овие земји што поскоро да влезат во Европската унија“, изјави новата словенечка министерка за надворешни работи.
На прашањето дали го поддржува влезот на Хрватска во Шенген, таа рече дека го поддржува шенгенското проширување кон Хрватска, но и Бугарија и Романија, иако таа лично смета дека Шенген треба да се реформира пред проширувањето и дека довербата меѓу сегашните членки на Шенген е нарушена.
Фајон заедно со досегашниот министер Логар, по преземањето на должностите во Министерството, потврди дека Словенија ќе продолжи да и помага на Украина и нејзиното приближување кон Европската унија, но и за крајот на војната.