Сојузот на синдикатите на Македонија (ССМ) денеска реагира на законските измени кои се однесуваат на регулирање на правото недела- неработен ден. Според ССМ, недопустливо и несериозно е измените да се носат без учество на социјалните партнери.
„На овој начин се врши кршење на законските одредби и подривање на принципите за градење на националните стратегии и политики во сите области, а најзначајно во областа на работно- правните односи по пат на социјален дијалог со активно учество на социјалните партнери. Поради тоа ССМ како најброен и репрезентативен синдикат бара предложените измени и дополнувања на ЗРО да се повлечат од собраниска процедура, затоа што не е спроведена постапка на анализа и целосен увид на резултатите од досегашната примена на одредбите од законот за недела неработен ден за да можат да се видат ефектите од примената на овие одредби, па дури потоа да се преземаат активности за подобрување на законскиот текст, но не во правец на намалување на правата на работниците“, објавија од ССМ на нивниот фејсбук профил.
Едностраното, необјективно и тенденциозно додавање на дејности во исклучоците, како што посочуваат од ССМ, во кои работниот процес е од таква природа што не може да се прекине и поради тоа за овие работници ден на неделен одмор може да биде друг ден го разнишува концептот и причините поради кои се воведоа законските измени за недела- неработен ден, а тоа беше најголемиот број на работници да го користат денот недела за обнова на својата работна сила, грижа за семејството, културните, образовните, спортските и сите други реални животни потреби кои ќе обезбедат достоинствен живот за работникот и неговото семејство.
Со тоа, наведуваат, ќе се постигне поголема продуктивност, мотивираност и успешност во обавувањето на работните задачи што ќе резултира со зголемено производство и продуктивност во работењето.
„Уште еднаш укажуваме дека ССМ бара Предлог законот за изменување и дополнување на Законот за работните односи во делот на одредбите кои се однесуваат на регулирање на правото недела- неработен ден, да се повлече од собраниска процедура и да не се расправа, ниту пак да се гласа по истиот затоа што во донесувањето на законските измени исклучени се од учество работниците и синдикатите, како и поради тоа што овие измени претставуваат намалување на правата на работниците“, објавија од ССМ на фејсбук.
Законското решение за недела неработен ден стапи на сила од 01-ви јануари годинава. Со измените, 92 отсто од работниците не работат во недела.
За работниците од техничко-технолошкиот процес не смеат да бидат прекинати законот предвидува исплата за 50% повисока дневница и за 100% повисока дневница за работа во недела за вработените во трговските центри.