Руските сили гранатирале десетици градови во Донбас и се приближувале кон опкружување на два клучни града во регионот каде што илјадници цивили се во опасност да немаат излез, соопшти украинската војска. Русите напредуваа кон клучните збратимени градови Северодонецк и Лисичанск на двата брега на реката Сиверски Донецк, при што борбите ги достигнаа границите на Северодонецк. „Руските трупи напреднаа доволно далеку што веќе можат да стрелаат со минофрлачи врз градот“, рече гувернерот на областа Луганск, Серхи Хејдеј на 25 мај. Падот на двата града ќе ја остави целата провинција Луганск под руска контрола, што е една од целите на Кремљ во неговата војна.
Москва нуди сигурен премин на извозот на храна од Украина во замена за олеснување на санкциите
Сепаратистите поддржани од Москва, цитирани од руската новинска агенција ТАСС, на 26 мај тврдат дека држат околу 8.000 украински воени заробеници, но тврдењето не може да биде независно потврдено. И покрај сегашниот моментум, руската офанзива имала сериозни оперативни неуспеси, сугерира британското разузнавање во својот дневен билтен на 26 мај. Во меѓувреме, претседателот Володимир Зеленски ги критикуваше сугестиите Украина да направи територијални отстапки на Русија за да ја прекине војната, споредувајќи ја идејата со смирувањето на нацистичка Германија од страна на Запад во 1938 година.