Амбасадорите на земјите на Квинта (Франција, Германија, Италија, Обединетото Кралство и САД) повторно ја повикаа Владата на Косово целосно да го регистрира земјиштето на манастирот Дечани без дополнително одлагање, согласно одлуката на Уставниот суд.
„Спроведувањето на владеењето на правото и почитувањето на независноста на судството се одговорност на сите демократски избрани влади. Тие се исто така неопходни предуслови за демократска консолидација на Косово и негова интеграција во европските и евроатлантските институции“, соопштија амбасадорите.
Квинта е неофицијална група за донесување на одлуки составена од САД, Италија, Германија, Обединетото Кралство и Франција и делува како „директориум“ на различни ентитети како што се НАТО, Г7 и Г20.
На 20 мај 2016 година, Уставниот суд на Косово пресуди дека манастирот Високи Дечани поседува 24 хектари земјиште и шуми.
Иако одлуките на Уставниот суд се конечни и обврзувачки за сите страни, локалните власти во Дечани одбиваат да го спроведат бидејќи сметаат дека имотот е на социјалните претпријатија „Апико“ и „Илирија“, а дека никогаш не му припаѓал на манастирот.
Тие оценуваат и дека Уставниот суд ја легализирал одлуката на Слободан Милошевиќ од 1997 година кога одлучил тој имот да му го подари на манастирот Високи Дечани.