Македонскиот претседател Стево Пендаровски упати честитка по повод Денот на трудот со порака дека Први мај е вистинска можност за потсетување на стремежот кон подобро и поправедно, европско општество. Тој во пораката посоочува дека како држава треба постојано дасе вложуваат напори за унапредување на правата на сите работници.
„Да се бориме за вистинска валоризација на секој работник и работничка во земјата, на секој поединец кој преку својата дејност, со својот труд и пожртвуваност придонесува за заедничкото добро“ вели Пендаровски.
Со честитка за меѓународниот ден на трудот се огласи и премиерот Димитар Ковачевски кој во неговата порака истакна дека работниците во него и во Владата имаат сојузник за секое прашање, како и дека сите заедно, Владата, работниците и синдикатите, ќе ги надминат сите предизвици.
Протести наместо скара на Први мај
„Работниците се движечката сила на економијата и општествениот развој. Затоа оваа Влада и јас како премиер го препознаваме и вреднуваме нивниот труд. Меѓународниот ден на трудот годинава го славиме во услови на глобална економско-енергетска криза. И покрај сите предизвици, останавме посветени на подобрување на условите за работа и зголемување на платите на работниците“, наведува премиерот Ковачевски.
Тој во пораката потсети и на како што вели, историското зголемување на минималната плата на 18.000 денари.
Димовски - Партиски работници живеат на грбот на колегите кои вистински работат
Претседателот на Собранието Талат Џафери упати честитка по повод 1 Мај во која порачува дека сите постојано треба да се бориме за почитување на работничкиот труд и работничките права, но се осврнува и на протестот на просветните работници, изразувајќи надеж дека набрзо ќе се постигне договор за нивните примања зашто децата, како што потенцира, не смеат да трпат.
„Се надевам дека со обострана искрена намера и волја набрзо ќе се постигне договор и ќе се продолжи онаму каде што се застана. Децата не смеат да трпат, тие се нашата иднина, иднина на нашата држава. Градењето на рамноправна заедница која се грижи за доброто на сите свои граѓани и ја стимулира желбата за личен и колективен придонес е одговорност и водилка за сите нас, за менување кон подобро за сите нас. Честит 1 Мај, бидете живи, здрави и рамноправни!“, се посочува во честитката од претседателот на Собранието
Министерката за труд и социјална политика Јованка Тренчевска денеска со видео обраќање го честиташе 1 Мај, истакнувајќи дека во министерството се работи на решението кое ќе биде, како што нагласува, системско и солидарно за сите.
„Линеарно покачување од 2 806 денари за сите вработени во јавниот сектор. Во рамката за преговори за новиот Општ колективен договор е враќањето на регресот за годишен одмор, за целиот јавен сектор во 2023 година, како и нова методологија за пресметка на платите, со која ќе се обезбеди редовна корекција на платите според критериуми кои ќе бидат утврдени и која ќе се преслика во гранските колективни договори, што значи постојан раст на платите во јавниот сектор“, истакнува Тренчевска.
Таа соопшти дека во финална фаза на подготовка е и новиот Закон за работни односи, кој ќе одговори, како што вели, на потребите на едно современо општество, а до крајот на оваа година се очекува да биде усвоен од страна на Собранието.