Министерката за труд и социјална политика Јованка Тренчевска се надева дека наставниците, професорите, воспитувачите и негувателите ќе се вратат на работните места од утре откако беше постигнат договор меѓу Владата и СОНК.
„Вчера после три и пол часовен разговор, дијалог со претставниците на СОНК беше договорено денеска претседателот и Одборот на СОНК да ги известат членовите на СОНК и сите оние вработени во образовните институции и во детските градинки кои штрајкуваат дека е постигнат договор со Владата, односно дека е постигнат договор за 12 проценти покачување на платите со јулската плата, значи после ребалансот. Се надевам дека сите оние коишто штрајкуваа ќе се вратат на своите работни места“, изјави министерката по посетата на малиот групен дом за деца без родители и родителска грижа и Центарот за поддршка на згрижувачки семејства во Скопје.
Таа информира дека на вчерашната средба се разговарало се разговарало и за К-15 да се исплаќа во 2023 година, кој ќе биде дел од општиот колективен договор, како и за нова методологија која ќе биде дел од општиот колективен договор, а понатака ќе се пресликува во гранските колективни договори што, според неа, значи и постојан раст на платите во образованието и во детската заштита.
Членството на СОНК денеска треба да донесе одлука за прекин на штрајкот по постигнатиот договор со Владата по што од утре се очекува учениците да се вратат на настава. Раководството на СОНК и Владата вчера постигнаа договор за зголемување на платите од 12 проценти од месец јули, а средствата ќе бидат обезбедени со релабансот на Буџетот.
Штрајкот во основното и средното образование и детските градинки почна на 11 април. СОНК бараше зголемување на платите за 18,4 проценти и усогласување на останатите плати со минималната плата. Владата првично предложи зголемување на платите од 10 проценти, но овој предлог беше одбиен од СОНК.