Од Ванда Обидкова до Бујар Османи

УКРАИНА - Украинка која ја преживеа нацистичката окупација на украинскиот град Мариупол, почина додека се криеше во подрум за време на руската опсада на пристаништето. 91-годишната Ванда Обидкова, активен член на еврејската заедница во Мариупол која го преживеала Холокаустот, починала во подрум премрзната и молејќи се за вода на почетокот на април, откако била заробена во градот со недели за време на интензивното гранатирање од руските сили. На 10-годишна возраст, Ванда ги преживеа Германците криејќи се во подрум во Мариупол. 81 година подоцна, таа почина во подрум во истиот град како жртва на ужасната војна која се криеше од Русите, напиша на својот твитер профил Спомен група за Аушвиц. Обидкова е родена во Мариупол во 1930 година. Нејзината мајка и неколку членови на семејството загинале за време на нацистичката окупација во Втората светска војна.

МАКЕДОНИЈА / САД - Билатералните односи меѓу Северна Македонија и Бугарија, и потребата од што поскоро надминување на разликите меѓу двете земји, и со тоа кревање на рампата за отворање на пристапните преговори со Европската унија. Ова се темите кои биле во фокусот на телефонскиот разговор на македонскиот министер за надворешни работи, Бујар Османи со заменик помошник државен секретар за европски и евроазиски прашања и специјален претставник на САД за Западен Балкан Габриел Ескобар, соопшти МНР.

ЦРНА ГОРА - Во Црна Гора од денеска стапува во сила забраната на емитување на руските медиуми Раша тудеј и Спутник, едногласно донесе одлука Советот на Агенцијата за електронски медиуми. Со оваа одлука и официјално Подгорица се усогласува со одлуките на Европската Унија во мерките преземени против Русија поради инвазијата врз Украина.

ЕУ / СРБИЈА - Европскиот парламент со Резолуција ќе изрази жалење што Србија не се приклучила кон санкциите на Европската Унија по руската инвазија врз Украина. Во Резолуцијата Европскиот парламент ќе ги повика новоизбраните власти во Србија да покажат вистинска посветеност на вредностите на Европската унија и да се усогласат со одлуките и позициите на ЕУ во надворешната и безбедносната политика, вклучително и со санкциите против Русија.

МАКЕДОНИЈА - Над сто шишиња со масло од канабис вчеравечер биле украдени од крушевска фирма во стечај која до лани имала лиценца за производство на медицински канабис. Од полицијата велат дека кражбата е пријавена вчера околу пладне од раководителот на агенцијата која го обезбеудвала објектот а пријавено е дека се украдени 108 шишиња полнети со различна количина на масло од канабис и 6 кеси со цветови од канабис чија тежина не е прецизирана.

МАКЕДОНИЈА - Штрајкот во детските градинки, основното и средното образование продолжува. Претседателот на СОНК Јаким Неделков изјави дека Советот на СОНК смета дека предлогот на Владата за зголемување на платите од 10 насто со цел да биде прекинат штрајкот во образованието не водат кон подобрување на состојбите и со нив се врши силен притисок врз штрајкувачите.

УКРАИНА / ЕУ - Мора да има правда за наводните злосторства извршени од руските сили во Украина, изјави денеска претседателот на Европскиот совет, Шарл Мишел, кој ја посети Украина во знак на поддршка, додека таа се бори да ја одбрани од неиспровоцираната инвазија на Москва. Тој во објавата на неговиот профил на социјалната мрежа Твитер напиша дека историјата нема да ги заборави воените злосторства што беа извршени како во Буча, така и во други градови во Украина.