Пакистанската армија ги отфрли обвинувањата на премиерот Имран Хан дека Соединетите Држави стојат зад неговото соборување по гласањето недоверба во парламентот.
Хан тврдеше дека предлогот поднесен против него на 8 март е дел од „надворешен заговор“, споменувајќи ги Соединетите Држави, што Вашингтон и пакистанските опозициски партии постојано го негираа .
Хан, кој беше сменет на 9 април по гласањето недоверба во Националното собрание на земјата, првично го блокираше предлогот, велејќи дека Советот за национална безбедност го одобрил наводниот заговор.
Портпаролот на армијата, генерал-мајор Бабар Ифтихар, го негираше тоа тврдење.
- Пакистанскиот парламент ќе гласа за доверба на премиерот Хан
Ифтихар рече дека армијата го претставила својот став на состанокот и потоа објавила изјава во која јасно се напишани резултатите од состанокот.
„Можете јасно да видите дали има збор за заговор во таа изјава. Мислам дека не“, рече Ифтихар на прес-конференција.
Хан го свика состанокот на Националниот совет за безбедност за да сподели писмо со раководството на армијата и другите членови на комитетот за кое тврди дека било испратено од пакистанскиот амбасадор во Соединетите држави.
Тврдеше дека амбасадорот му пишал дека американски официјален претставник му рекол дека Вашингтон е вознемирен од посетата на Хан на Русија и неговата средба со рускиот претседател Владимир Путин на 24 февруари, денот кога руските сили ја нападнаа Украина.