Цената на дизелот на полноќ ќе се зголеми за четири денари по литар одлучи Регулаторната комисија за енергетика (РКЕ).
Цената на бензинот останува иста, а расте малопродажната цена на Екстра лесното масло за домаќинство (ЕЛ-1) за 2,50 денари по литар, како и цената на Мазутот М-1 НС за 1,238 денари по килограм.
Со денешните промени, новата малопродажна цена на ЕУРОСУПЕР БС – 95 од полноќ ќе биде 79 денари по литар, ЕУРОСУПЕР БС – 98 по 81 денари по литар, а ЕУРОДИЗЕЛ БС (Д-Е V) ќе чини 81 денари по литар. Малопродажната цена на Екстра лесното масло за горење (ЕЛ-1) ќе изнесува 78 денари по литар, а цената на мазутот М-1 НС – 53,592 денари по килограм.
Од Регулаторна поскапувањето го правдаат со раст на референтните цени на нафтените деривати на светскиот пазар кои во споредба со претходната пресметка бележат зголемување во просек од 2 до 5 отсто.
Поради растот на цените на светските пазари цените на енергенсите почнаа да растат кон крајот на минатата година, а по руската инвазија на Украина тие дополнително се зголемија бележејќи рекорди. Со измени на законите со кои се намалува ДДВ-то, маржите и царинските давачки за горивата, цените од минатата недела почнаа да бележат благ пад.
Од Регулаторна најавија дека поради кризата, регулирањето на цените на горивата по потреба ќе го прават на дневно, наместо на неделно ниво како што беше пракса до неодамна.