Британскиот премиер Борис Џонсон ја повика Кина да заземе став и да ја осуди руската инвазија на Украина.
Во интервју за Сандеј Тајмс на 20 март, Џонсон ја повика Кина, како и другите земји кои не зазедоа став, да им се придружат на западните земји во осудата на руската инвазија.
„Како што поминува времето и расте бројот на руски ужаси, мислам дека станува сè потешко и политички непријатно за луѓето активно или пасивно да ја толерираат инвазијата на Путин“, рече Џонсон.
Тој оцени дека земјите кои не сакаат да се изјаснат сега се пред „големи дилеми“.
„Мислам дека Пекинг почнува да се сомнева“, рече британскиот премиер.
Тој ги повтори зборовите на украинските власти кои ја повикаа Кина да го „осуди руското варварство“ по новите напади.
Претходно денеска кинескиот министер за надворешни работи Ванг Ји изјави дека Кина е на вистинската страна на историјата во врска со украинската криза, што ќе го покаже времето, а нејзината позиција е во согласност со желбите на повеќето земји.
„Кина никогаш нема да прифати никаков надворешен притисок или принуда и се спротивставува на какви било неосновани обвинувања и сомневања“, им рече Ванг на новинарите.
Коментарите следуваат откако американскиот претседател Џо Бајден на 18 март го предупреди својот кинески колега Си Џинпинг за „последиците“ доколку Пекинг обезбеди материјална поддршка за руската инвазија на Украина.