Американскиот претседател Џо Бајден и кинескиот лидер Си Џинпинг го започнаа телефонскиот разговор во кој фокусот ќе биде на руската инвазија врз Украина и ставот на Пекинг околу истата. Белата куќа и кинеските државни медиуми веќе го објавија стартот на разговорот.
Еден ден пред нивниот телефонски разговор, државниот секретар Антони Блинкен на брифинг со новинарите рече дека Бајден јасно ќе му стави до знаење на Џинпинг дека „Кина ќе сноси одговорност за какви било активности што ќе ги преземе за поддршка на руската агресија и нема да се двоумат да наметнат економски последици“.
Бајден и Џинпинг се очекува да разговараат и за економската конкуренција меѓу двете земји. Разговорот беше закажан по состанокот во Рим на 14-ти март меѓу советникот за национална безбедност на Белата куќа Џејк Саливан и високиот кинески советник за надворешна политика Јанг Џиечи.
За време на состанокот, Саливан изрази загриженост за усогласувањето на Кина со Русија. Висок официјален претставник на администрацијата на Бајден рече дека Саливан бил директен со Јанг за „потенцијалните импликации и последици“ за Кина доколку таа обезбеди поддршка за Русија.
Кина и Русија ги интензивираа своите билатерални односи во последниве години, а Кина не ја осуди експлицитно руската инвазија на Украина, што предизвика загриженост во Вашингтон.
Американски официјални лица предупредија дека Кина ги засилила дезинформациите што Русија може да ги искористи како изговор за напад врз Украина со хемиско или биолошко оружје. Има информации и дека Русија посегнала по Кина за помош, што Русија го негира.
За време на неговиот состанок со Јанг, Саливан сакаше поголема транспарентност за ставот на Пекинг во однос на Русија и повтори дека сите обиди на Кина да и помогне на Русија да избегне санкции ќе бидат скапи за владата на Си.
Иако војната во Украина во последно време доминираше во фокусот на Бајден, официјални лица од Белата куќа велат дека не ја изгубиле од вид Кина - и гледаат да видат како Џинпинг ќе одлучи да постапува во ситуацијава.