Украинските и руските преговарачи се подготвуваат денеска да одржат разговори и покрај гранатирањето на предградијата северозападно и источно од Киев во текот на ноќта и континуираното бомбардирање низ целата земја.
Четвртата рунда разговори се очекува да се одржи преку видео-конференција на која ќе се разговара за добивање помош за градовите и населените места под опсада, изјави помошникот на украинскиот претседател Михаило Подољак.
„Русија веќе почнува да зборува конструктивно. Мислам дека ќе постигнеме некои резултати буквално за неколку дена“, изјави Подољак во видео порака објавена вчера.
Дипломатските напори ги зголемија надежите дека Москва би можела да го отвори патот за повеќе цивили да се евакуираат дури и кога руските сили го продолжуваат притисокот врз главниот град.
Претходните разговори не доведоа до решение за добивање помош или конвои за евакуација до стратешкиот град Мариупол, каде што стотици илјади луѓе се соочија со екстремен недостиг на храна, вода и лекови.
Рускиот делегат на разговорите, Леонид Слуцки, беше цитиран од новинската агенција РИА Новости дека разговорите постигнале значителен напредок и дека е можно делегациите наскоро да постигнат нацрт-договори.
Русија распоредува припадници на озлогласена украинска полициска единица во окупираните региони
Украинските власти вчера соопштија дека треба да се отворат повеќе од 10 хуманитарни коридори, вклучително и до Мариупол, но таквите ветувања од руската страна постојано пропаѓаат.
Меѓународниот комитет на Црвениот крст рече дека страдањето во Мариупол е „едноставно огромно“ и дека телата на цивилите и борците остануваат заробени под урнатините или „лежат на отворено каде што паднале“.
Борбата за Мариупол е клучна бидејќи се наоѓа во област што може да и помогне на Русија да воспостави копнен коридор до Крим, кој го одзеде од Украина во 2014 година.
Руски ловци пукаа и кон аеродромот во западниот град Ивано-Франковск, кој е на помалку од 150 километри северно од Романија и 250 километри од Унгарија.