Москва сигнализираше дека е подготвена да ги продолжи разговорите со Западот за да се олесни кризата околу Украина, додека германскиот канцелар Олаф Шолц започна уште една дипломатска рунда со посетата на Киев велејќи дека нема „разумно оправдување“ за руското трупање на војници во пограничните области, поради што многумина стравуваат дека би можеле да бидат подготовки за напад на Украина.
Шолц на 14 февруари имаше двочасовна средба со украинскиот претседател Володимир Зеленски и ја повика Русија да преземе итни чекори кон намалување на тензиите предизвикани од нејзиното трупање на околу 130.000 војници во близина на границата со Украина, додавајќи дека Кремљ треба да прифати понуди за да разговара за европската безбедност.
Говорејќи на телевизискиот состанок со рускиот претседател Владимир Путин, министерот за надворешни работи Сергеј Лавров рече дека иако Москва предупредила дека преговорите не можат да бидат „бескрајни“, тој исто така посочи дека се уште има простор за дипломатија.
Путин треба да се сретне со Шолц на 15 февруари. Белата куќа соопшти дека Русија е можно да планира да ја нападне Украина во било кој ден наскоро, додека продолжува собирањето на војниците. Русија вели дека нема план да ја нападне Украина, но во исто време бара гаранции дека НАТО нема да се прошири во земји како Украина или во другата поранешна советска република, Грузија.