Франција е многу важна држава членка на ЕУ без која не може да се утврди крупна политика во проширувањето, тоа го видовме и осетивме на своја кожа во 2019 година. Сметам дека напорите на претседателот Емануел Макрон се искрени. Тие помагаа и досега, заедно со Германија и други фактори, но тоа не значи дека проблемите ќе ни ги реши некој друг, туку дека треба да имаме амбиент во кој ќе имаме европско решение базирано на европски вредности, изјави вицепремиерот за европски прашања, Бојан Маричиќ во „Утрински брифинг“.
Според Маричиќ, тоа што е важно и добро, е што Франција, која во минатото често ја избегнуваше темата за проширувањето, денес има појасна, поотворена и поамбициозна политика кон Балканот. Вицепремиеро, исто така, најави дека во текот на денот ќе има средба заедно со премиерот Ковачевски со францускиот амбасадор, а наскоро ќе замине и во посета на Париз со министерот Османи, за дискутирање на нивните приоритети и како Франција може да помогне во овој процес.
Во однос на посетата на бугарскиот премиер Петков на Скопје, Маричиќ вели дека дава нов импулс и енергија на односите. Тој на прашањето кога очекува одблокирање на процесот на евроинтеграција рече дека целосно се ослободени од лицитација со датуми или месеци и оти е важно структурата да профункционира и даде резултати кои ќе бидат видливи за граѓаните.
Маричиќ истакна државен интерес е час поскоро да се тргне ветото од страна на Бугарија, но тоа не треба да се прави по секоја цена, исто така, додавајќи дека решението мора да биде такво во кое Северна Македонија ќе биде уважена и ќе имаме исход кој ни одговара нам и ќе биде поддржан од нашиот Устав.
Бугарија ја блокираше македонската европска интеграција во 2020 година, а новиот бугарски премиер Кирил Петков неделава беше во Скопје на првата средба со новиот македонски премиер Димитар Ковачевски по што се најави нов пристап во разговорите меѓу Софија и Скопје. Франција е актуелен шестмесечен претседавач со Европската унија.