САД ја обвинија Русија дека испраќа диверзанти во источна Украина со цел да организира инцидент што би можел да даде изговор за инвазија доколку не се исполнат безбедносните барања на Москва во преговорите со Западот.
Американски официјален претставник денеска изјави дека Белата куќа е загрижена дека руската влада „се подготвува за инвазија во Украина што може да резултира со широко распространето кршење на човековите права и воени злосторства доколку дипломатијата не ги исполни нивните цели“.
„Руската војска планира да ги започне овие активности неколку недели пред воената инвазија, која би можела да биде помеѓу средината на јануари и средината на февруари“, рече американскиот официјален претставник, кој зборуваше анонимно.
Портпаролот на Кремљ, Дмитриј Песков рече дека проценката се заснова на „неосновани“ информации.
Додека САД и нивните западни сојузници алармираа поради масивното трупање руски војници во близина на Украина, за кое веруваат дека може да биде увертира за инвазија, Русија побара писмени гаранции дека НАТО нема да ги прими поранешните советски држави, како што е Украина.
Вашингтон и неговите сојузници во НАТО одржаа три рунди разговори со Русија оваа недела во обид да ја смират ситуацијата, но, додека изразија отвореност за дијалог, тие јасно ставија до знаење дека за политиката на НАТО на отворени врати за суверени држави не може да се преговара.
Руското трупање на околу 100.000 војници во близина на Украина, чиј полуостров Крим беше заземен од Русија во 2014 година, беше оценета како тактика на притисок за која Вашингтон рече дека нема да биде наградена.
„Ја видовме оваа книга во 2014 година со Крим“, рече американскиот официјален претставник.
Москва, која негираше дека планира да ја нападне Украина, рече дека не може да чека бесконечно за писмен одговор од Западот на нејзините безбедносни барања.