Шефовите на дипломатијата на земјите членки на НАТО ќе одржат видео состанок како подготовка на најавениот состанок на Советот НАТО-Русија што на 12 јануари ќе се одржи во Брисел. Состанокот на Советот е еден од трите што ќе се одржат како дел од напорите на САД и западните сили да ја одвратат Москва од евентуална инвазија врз Украина, откако распореди десетици илјади војници долж границата меѓу двете земји. Првиот е в понеделник во Женева, а САД ќе бидат претставени од заменик-државниот секретар Венди Шерман. Третиот состанок ќе се одржи на 13 јануари во Виена во кој ќе биде вклучена Организацијата за безбедност и соработка во Европа, група која ги вклучува САД и Русија како членки.
САД и Европа во обединет фронт пред разговорите со Русија
Рускиот претседател Владимир Путин побара правно обврзувачки гаранции дека НАТО нема дополнително да се прошири и дека Украина нема да ѝ се приклучи на трансатлантската алијанса.
Во Украина во услови на потенцијална руска инвазија „нема хистерија“
Американскиот претседател Џо Бајден во неделата му рече на украинскиот претседател Володимир Зеленски дека Соединетите држави и нивните сојузници ќе одговорат одлучно со економски санкции и други чекори доколку Русија ја нападне Украина. Тој, исто така, вети дека Соединетите Држави и нивните сојузници и партнери нема да направат, како што изјави „ништо за вас без вас“.