Претседателот на Србија, Александар Вучиќ изјави дека официјален Белград не се согласува со одлуката на американските власти да воведат санкции за српскиот член на Претседателството на Босна и Херцеговина (БиХ), Милорад Додик и дека Србија нема да ги спроведува.
Санкциите за дела за корупција се воведени против самиот Додик кој е лидер на Сојузот на независните социјалдемократи, но и против Алтернативната телевизија од Бања Лука, која е поврзана со него.
Одговарајќи на новинарски прашања денеска Вучиќ рече дека тоа се комплицирани работи кои „не се за итна реакција, а особено не за брзање“.
„Србија не мисли дека решението е во санкциите и нема сомнеж дека Република Србија нема да се согласи за ниту една точка, не само што нема да воведе санкции против членовите на својот народ и претставниците на нејзиниот народ во Босна и Херцеговина и Република Српска“, рече Вучиќ.
Тој рече дека одлуката на САД носи бројни предизвици не само за Република Српска туку и за Србија. Како „страшна“ ја оцени одлуката Алтернативната телевизија да биде ставена под санкции.
„Ќе имаме многу прашања до американската администрација за некои други медиуми и врски со криминалот и корупцијата, на кои се чини невозможно да се даде соодветен одговор, но тоа ќе го оставиме за времето веднаш по Божиќ“, рече Вучиќ.
Тој рече дека е загрижен поради воведените санкции, но додаде дека Србија мора да одржува „рационални и пристојни односи“ со САД.
Вучиќ најави дека на 10 или 11 јануари ќе разговара со Додик и со претседателката на Република Српска Жељка Цвијановиќ.