Од Шутка до Вашингтон

МАКЕДОНИЈА - Бизнисменот Орце Камчев излегува од притвор откако Апелациониот суд ја уважи жалбата. Судот ја прифатил и понудената гаранција од 11 милиони евра дека тој нема да ја напушти земјата. Камчев ќе има обврска еднаш неделно да се јавува во судот и да не го напушта местото на живеење, односно да не излегува од Скопје. Камчев пред неколку дена беше хоспитализиран во Систина.

КАЗАХСТАН - Уредникот на казахстанскиот сервис на РСЕ, Дархан Умирбеков е приведен денеска во главниот град на земјата Нур-Султан за време на протестите. Апсењето доаѓа само неколку часа откако полицајците накратко го приведоа и Касим Аманжол, в.д. шеф на бирото на казахстанскиот сервис во Алмати, додека известуваше од третиот последователен ден протести поради ненадејното, драматично зголемување на цената на течниот природен гас што се користи во возилата.

МАКЕДОНИЈА - Претседателот на СДСМ и мандатар за состав на новата влада, Димитар Ковачевски денеска порача дека државата има добри економски показатели и релизации остварени во изминатата година. Тој рече дека растот на економијата годинава ќе биде над 4 отсто.

ЕУ / УКРАИНА - Шефот на европската дипломатија Жозеп Борел кој од денеска до четврток ќе престојува во Украина изјави дека целта на неговото патување е да разговара со Украинците за нивните грижи и начините за нивно решавање. Тој рече дека сегашната ситуација е закана за стабилноста и безбедноста на Украина и на целиот регион.

МАКЕДОНИЈА - Министерството за здравство информира дека кај девет пациенти во земјава е детектиран омикрон сојот на корона вирусот.

МАКЕДОНИЈА - Македонските граѓани во првите девет месеци од минатата година потрошиле 203,1 милиони евра купувајќи од домашни онлајн продавници, што претставува пораст од 84,5 проценти во однос на истиот период во 2020 година.

ИРАН - Најмалку осум лица загинаа во поројните поплави на југот на Иран поради обилните дождови кои се очекува да траат до крајот на оваа недела, објавија денеска државните медиуми.

КИНА - Таканаречен „здравствен меур“ против коронавирусот денеска е поставен околу местото на одржување на Зимските олимписки игри во Пекинг, еден месец пред почетокот на натпреварот.

САД / УНГАРИЈА - Поранешниот американски претседател Доналд Трамп изјави дека целосно го поддржува Виктор Орбан за време на изборната кампања, оценувајќи дека унгарскиот премиер е голем лидер, кого сите го почитуваат.

АВСТРАЛИЈА / СРБИЈА - Српскиот тенисер Новак Ѓоковиќ соопшти дека ќе игра на Австралијан опен откако дозвола од организаторите да настапи со медицинско изземање за вакцинација.