Гувернери, нуклеарки, вакцини...
ГЕРМАНИЈА - Германската влада денеска соопшти дека нуклеарната енергија ја смета за опасна и дека се противи на предлозите на Европската унија таквата технологија да остане дел од плановите за борба против климатските промени.
РУСИЈА / ТУРЦИЈА - Претседателите на Русија и Турција, Владимир Путин и Реџеп Таип Ердоган разговараа за барањата на Москва до НАТО за решавање на украинската криза. Кабинетот на Ердоган соопшти дека претседателите разговарале за мерките за подобрување на билатералните односи.
САД - Американските санитарни власти денеска ја одобрија третата доза вакцина против коронаворус на компанијата Фајзер/Бионтек за деца од 12 до 15 години.
СРБИЈА - Здружението на еколошки организации на Србија го блокира денеска сообраќајот на патиштата во повеќе градови во Србија, барајќи забрана за ископ на литиум, односно Владата на Србија да го повлече планот за посебна намена на рудникот Јадар.
ВЕЛИКА БРИТАНИЈА - Британскиот премиер Борис Џонсон денеска предупреди дека здравствениот систем во земјата е под притисок поради големиот раст на бројот на заразени со коронавирус, но наведе дека нема да бидат воведени нови ограничувања за спречување на заразата.
ЕУ / УКРАИНА - Шефот на европската дипломатија Жозеп Борел од утре до четврток ќе престојува во Украина, а во источна Украина ќе ја посети линијата на фронтот со проруските сепаратисти за да ја изрази поддршката на ЕУ за територијалниот интегритет на земјата, објави денеска Европската комисија.
СРБИЈА / РУСИЈА - Претседателот на Србија, Александар Вучиќ ја пофали новата пратка оружје од Русија и покрај стравувањата на Балканот дека новото наоружување на земјата може да доведе до поголеми тензии во регионот.
МАКЕДОНИЈА - Поради компликации од коронавирусот денеска почина Марјан Додовски, прв министер за животна средина и просторно планирање на ВМРО-ДПМНЕ од 1998 до 2002 година. Веста ја соопшти неговата поранешна сопруга Иванка Василевска на нејзиниот Фејсбук профил.
БУГАРИЈА / МАКЕДОНИЈА - Слави Трифонов, лидерот на движењето Има таков народ, на својот Фејсбук профил предложи САД да ги укинат визите за бугарските граѓани, а Бугарија во замена да го тргне ветото кон Северна Македонија за влез во Европска унија.
МАКЕДОНИЈА / БУГАРИЈА - Министерот за надворешни работи Бујар Османи на денешната прес-конференција на која говореше за нашето претседавање со ОБСЕ во 2023 година изјави дека очекува конструктивни разговори со новата бугарска влада, враќање на довербата, разговор по однос на суштинските прашања и брзо деблокирање на процесот.
МАКЕДОНИЈА - Гувернерката на Народната банка, Анита Ангеловска-Бежоска најави воведување на финансиски омбудсман, со кој би се формирала посебна институција којашто ќе постапува по поплаките на граѓаните и ќе се гради рамка за посилна заштита на правата на потрошувачите.
ИРАК - Две вооружени беспилотни летала беа соборени додека се приближувале до воениот објект во кој се сместени американските сили на меѓународниот аеродром во Багдад, соопштија безбедносни извори, во услови на зголемени регионални тензии на втората годишнина од убиството на највисокиот ирански генерал.